أنت قوية لذا عليكِ النهوض لوحدك دائماً

كلمة وحدة كفيلة أنها تجبرك تخبي وجعك، تحتوي نفسك بنفسك، لأنك صدّرت صورة عن حالك مابتخلي حدا يصدق أنك موجوع، “أنت قوية لذا عليكِ النهوض لوحدك”.

أنت قوية لذا عليكِ النهوض لوحدك دائماً ـ فهل أنت قادرة؟

أنتِ قوية….
جملة سمعتا كتير لحد ما صدقتا بشكل مبالغ فيه.
أي بعرف حالي قوية، أي بعرف أني قدا…
بس شو رأيك، لما تشوفني لمرة، تنسى أني قوية وتعاملني على أني شخص ضعيف محتاج الاحتواء؟

ليش نحن بنشوف القوة ضد الضعف، والاهتمام ترف للقوي؟!
مين قال أنو عكس القوة هو الضعف؟
عكس القوة هو الراحة، يعني أنا وقت مابدي ساوي شي، مابدي عالج مشكلتي، مابدي صحح خطأي وفشلي، مابدي ابعد عن العلاقات السامة، يعني أنا مرتاح بهالوضع اللي عم تعّب قلبي فيه.

وبالمقابل، القوي مابيعني أنو هو ماضعيف… هو ضعيف بس بدرجات معينة وبتفاصيل مختلفة.
هو شخص متلو متل غيرو، بيختلف عنهم بس أنو بيبعد عن النمطية المتعارف عليها للعيش، بخالف كل شي، وبحارب ليضلوا ثابت، وبيبعد عن أي شي بسببلو الأذى، لأنو منطقة الراحة عندو مختلفة عن منطقة الراحة بالنسبة للي حابين هاد الدور.

لوضحلك ياها أكتر.
منطقة الراحة، هيي الحالة اللي بتقول فيها لنفسك، أنا بستاهل أقعد، بستاهل نام، بستاهل أني أبحث بس عن الراحة بدون جهد، ماني مضطر قاوم، ماني مضطر ساوي شي، لك حتى فرشتي مو حاسس أنو لازم ساويها.

مابدي أبعد عن العلاقة المؤذية، لأنو عم تقدملي شيء حلو بدونو مافيي حتى لو كانت بالمقابل عم توجعني أكتر ما تفيدني!.

ماعبالي مارس أي نشاط بدني، ولا على بالي فكر ببكرا أو بمستقبلي…. هاد مابيعني أني ضعيف، أنا بدي ضل مرتاح!.

أما بالنسبة للضعف، فهو جزء من شخصية القوي، اللي عمل كل شي بخلي بكرا عندو أحلى وكانت بالنسبة ألو منطقة الراحة هيي النجاح، التقدم، تطوير الذات، الاكتفاء بالنفس، ودرء أي شعور سلبي ممكن يجيك من المحيط، وبعدا فجأة….. وقع!.

النهوض من هي الوقعة، هو الضعف!
هو الحالة اللي بيحتاج فيا الاحتواء، فياريت نتنبه لفكرة أنو القوي كمان عندو نقاط ضعف، بتتطلب نوع من الاهتمام الخاص، إلغاء التطبيع عند الناس بأنو القوي مو محتاج حدا.

بالعكس، يمكن هو أكتر شخص محتاج حدا، لأنو اللي دوّر عالراحة بالبعد عن أي جهد أو شيء يصقل فيه ذاتو، بحجة أنو بستاهل بس يعيش متل “الأمير” هاد بالذات، أخد كل الاحتواء!.

احتواء من الراحة.
احتواء من الأصدقاء يلي عم يقضي معظم وقتو معن على ولاشي.
احتواء من تصديرو لفكرة الضعف بصورة يستعطف فيا الناس.
احتواء حتى بالفرص!!.

فتخيل…. حدا كتيييير مرتاح أجاه كل شي بدون ولا شي.
والقوي بسبب هي الهالة والنمطية المتعارف عليها عنو، ما أخد شي!!

طيب قولك هلق من حديثي….. أنت فهمت شي؟.