مجموعة من إيفيهات الأفلام المصرية لكل المواقف
وسط أعباء الحياة، نحتاج إلى قسط من المرح والترفيه، يمكنك الحصول عليه من خلال إيفيهات الأفلام المصرية، فهي عبارة عن مزيج ممتع من الضحك المتواصل.
مجموعة من أقوى إيفيهات الأفلام المصرية المضحكة
فيلم (سعيد كلاكيت)
-وايه المشكلة يعني؟
: المشكلة بقى في شغلانتنا دي إن كل واحد فاهم إن هو فاهم، وكدا مش ممكن يفهم، بالك بقى لو فاهم إن هو مش فاهم، كدا ممكن يفهم، حضرتك فاهم؟
-لا مش فاهم.
: يبقى هتفهم.
فيلم (وش إجرام)
: بيقولوا عليك إن انت متخصص تشكيل عصابات دولية.
-يا باشا أنا راجل ليا كلمتي في السوق، وليا فلوس، ممكن يبقى ليا أعداء يقولوا عليا أي حاجة.
: أول عصابة شكّلتها كانت سنة كام؟
-والله يا باشا مش فاكر، ده كلام قديم، بس تقريباً أول عصابة شكّلتها كانت يا تانية اعدادي يا تالتة اعدادي، في الرنج ده.
: تانية اعدادي! يابن اللعيبة دانت عفريت، وكانت عصابة ايه يا طه؟
-كنا بنخطف بنات من ثانوي.
: بنات! وكنتوا بتعملوا فيهم ايه؟
-بنرجعهم اعدادي.
فيلم (بوحة)
السؤال بيقول: علل.. علل.
-علل؟ علل ايه؟
: علل يعني افطن.
-طيب، قول.
: هل محلات الجزارة دي، بتبيع لحمة؟
فيلم (دكان شحاتة)
-يا أحلى من المانجا يا موز.
: بقولك ايه يا ريس، هي العربية دي بالموز اللي عليها تطلع بكام؟
-اشمعنى؟ شاري يعني ولا بتتسلى؟
: يا عم هتسلى بعربية موز، شايفني قرد ادامك!
فيلم (بلية ودماغه العالية)
: بقولك ايه، أنا عاوز أقولك على حاجة.
-قول يا حبيبي.
: احنا اخوات مفهاش حاجة.
-أكيد.
: احنا نعرف بعض بقالنا أد ايه؟
-من واحنا عيال صغيرة.
: كفاية بقى وحيات أبوك.
فيلم (غبي منه فيه)
: أنا ايه اللي مشاني وراك، ايه اللي مشاني وراك مانا كنت في حالي، فقرتني وجبتلي الفقر.
-أيوة انا اللي غلطان، أنا اللي حبيت أعمل منك شيء.
: شيء! آه.
فيلم (حملة فريزر)
: ايه ده يخرب عقلك، لقيت بصل أخضر.
-بصل ايه؟ ده ورد.
: ورد!
-دي أقل حاجة أقدر أقدمها لواحدة بالرقة والجمال والبراءة دي.
: براءة! دا انا كفالة، ياريت كنت براءة، يسمع من بؤك ربنا، لسه القضية شغالة.
فيلم (اللمبي)
: دانا كنت زي الوردة واقفة في وسط العجل، العجل راح وكله راح، دانا كنت رايحة بالسكر والضغط، العدو ميشفهاش، راجعة بالمرارة.
-وايه اللي رجعك بالمرارة، مسبتهاش تروح ليه مع اللي راحوا هناك؟
: نصيب، دانا طول الليل يا بخ، الوجع هنا، والوجع هنا، والوجع هنا.
-ألف بعد الشر عليكي، معلش، يلا فداكي، اللي راح راح، المهم إن أنا محتاج إيجار الشهر لأن أنا ممعيش ولا مليم يا فرنسا.
: يا راجل يا عديم الحساسة، أقولك مرارة، تقولي إيجار الشهر! إنت جنس جبلتك ايييه؟
فيلم (لخمة راس)
: ومين عمل كدا في عينيك يا دراعي؟
-مالها عينيا يا ريس.
: انت أحول ياض.
-أحول؟ انت فاجئتني بالموضوع ده.
فيلم (عصمت أبو شنب)
-عايزة تاخدي عصير خبرتي.
: هااااا؟
-نمرة واحد.
: اكتب يا تبعو.
*حاضر يا باشا.
-تأنطريها وتأنبريها، وعينك تسبليها، على الزبون وتسنتريها، حواجبك ترقصيها، شفايفك تشفطريها.
*يا ليلة سودا! اكتب الحاجات دي ازاي؟
فيلم (الناظر)
: انا لازم اتغير، لازم اتغير يعني لازم اتغير، عاوز اشوف ناس جديدة، اصاحب ناس، مش مهم يكونوا وحشين حلوين، بس أعوض اللي راح مني، أشوف دنيا.
-ايوة يعني عاوزنا نعمل ايه؟
: يعني نبقى صايعين، صيعني يا عاطف، أنا عاوز أبقى صايع.
فيلم (خير وبركة)
: انت لميت كام؟
-12 ونص.
: ده الضهر ده ولا الساعة ولا انت خارج ولا ايه قصتك، ايه الرقم ده؟
-12 جنيه ونص.
: لميت 12 جنيه ونص بس؟ دانت لو اشتغلت.. دانت لو مشتغلتش كنت لميت أكتر.
باقة ممتعة من قفشات الأفلام المصرية
فيلم (جحيم في الهند)
-ألو.
: ألو.
-أيوة، مساء النور، أيوة كدا اتكلم، التليفون اللي بتتكلم منه ده بيتهيألي بتاعي؟
: أنا الحرامي.
-دانت بجح أوي، سرقته ازاي؟
: هكون سرقته ازاي؟ بمجهودي.
فيلم (فول الصين العظيم)
: في موضوع عاوز أكلمك فيه.
-موضوع ايه، أؤمر.
: عليا شيك، بست الاف دولار، مزنوق.
-عليك شيك بست الاف دولار؟ هعمل ايه في المحل عندي مصاريف وتكلفة، ستة؟
: مزنوق.
-خلاص عرفت ان حضرتك مزنوق، خلاص، بقولك ايه يا جدي…
: مزنووق.
-يا سيدي والله عرفت ان انت مزنوق، 250 دولار يمشوا الموضوع؟
: مزنوق.
-مزنوق مزنوق، انت خلاص مسكت على مزنوق، اعمل اييييه؟ بقولك ايه انا كلت في بيتكو عيش وملح، وانتوا احتضنتوني بصراحة، انا هديك الفلوس.
: مزنوق.
-يا عم قلتلك هديهملك، انت مزنوق مزنوق ايه، ولا مش ناوي ترجعهم.
: ده كان امتحان يا موهيي، ونجحت.
-امتحان؟ يعني مش هتاخد الست الاف دولار؟
: لأ.
-لأ ليه يا راجل، دانا كنت ناوي اديك العشرين، يا حبيبي يا جدي، يا حبيبي يا حبيبي يا حبيبي يا مزنوق.
فيلم (أمير البحار)
: ايه يا حجازي، يعني مقطعتش نفسك عليا، ولا دمك سال عشان خاطري، مشفتش سنتي شهامة.
-معلش، أصل انا خجول شوية في الحاجات دي.
: انت ايه؟
-خجول.
: أحيه.
فيلم (قصة الحي الشعبي)
: احنا انضحك علينا يا فيجاني.
-انا عبيط، انا عبيط وحمار ومغفل، حد يمشي ورا واحد اسمه بكتيريا، بكتيريا الجربان المعفن، لا بودرة نافعة، ولا مرهم نافع، نمشي وراك بإيه؟ آنتي بايوتك؟
فيلم (ازاي تخلي البنات تحبك)
: انت برج ايه؟
-برج النيلة الحوت.
: ياه، داحنا نبقى متوافقين أوي.
-لا ما هو مش حوت أوي، تقدري تقولي حوت على قرش، برج جديد لسه منزلش.
: تفتكر أنا برج ايه؟
-برج الأطباء.
فيلم (ظرف طارق)
: انت ايه؟
-إنسان.
: إنسان؟ هو أنا بقولك نوعك ايه؟ انت مين؟
-كائن، يعيش ويتعايش.
: يا بني آدم انت جاي حضانة؟ انت تبع ايه؟
-انا مش تبع حد، أنا رئيس جمهورية نفسي.
فيلم (اوعى وشك)
: خلاص، هبطل بانجو وهشرب حشيش.
-يعني هو الحشيش ده فوار؟ ما هو مخدرات بردو، تبطل كل حاجة.
: طبعاً طبعاً.
-وكلمة طبعاً دي كمان تبطلها، أنا بتشائم منها.
: خلاص هبطلها واشرب بانجو.
فيلم (الباشا تلميذ)
: انت مرفود من 3 جامعات حكومية بسبب سلوكك السيء.
-يا راجل!
: أنا معنديش التسيب الموجود في الجامعات الحكومية، أنا عندي انضباط، عندي التزام، مستوى تعليمي رفيع.
-معندكش سلطة يا فندم؟
فيلم (كركر)
: الكهربا اللي دخلت جسم ابنك، كفيلة بإنها تشغل مصنعين، ابنك اتكهرب في مية، يعني دخله كهربا ومية.
-الله! يعني أروح أقدّمله على عداد؟
فيلم (حرامية في تايلاند)
: وبالمناسبة دي بقى، ظبطلنا كاسين عشان اقولك هندخل ازاي.
-انت عاوز تشرب ادامي؟
: هو انت خالي؟ ما أشرب عادي ادامك.
-قووووم.
: أقوم أروح فين؟
-قوم نضرب اتنين نسكافيه.
: تصدق عندك حق.
فيلم (كلمني شكراً)
: أنا معايا نص المبلغ ونتصرف في النص التاني، انت معاك كام؟
-أنا على الأبيض.
: اشطة، يبقى فاضل كام؟
إيفيهات أفلام مصرية قصيرة لكل المواقف
- أنا معروض عليا وظايف يحلم بيها أي شاب في مصر، امبارح بس طلبوني بواب في عمارة، 1200 جنيه وأنا قاعد على الكرسي، أنا ماشي، انت قاعد؟ اقعد بالعافية. فيلم (يارب ولد).
- انا عايزك تروق كدا وتهدى ومتقرفناش معاك، لأن احنا أساساً قرفانين ومخنوقين، احنا هنا في سلة واحدة، فمفيش أي وقت حد ينط من السلة دي. فيلم (الرهينة).
- انت طول عمرك بتفكر غلط، أنا مش عجباني دماغك دي، انت بتحلق فين؟ فيلم (دكان شحاتة).
- عكس ايفيهات ايه؟ ايف خد. فيلم (عمر وسلمى 2).
- بُحسن جه متأخر. فيلم (وش إجرام).
- الحب يا معصعصة. فيلم (أبو العربي).
- هو انتوا من البلد اللي بتقول الجيم ديم، لا من اللي دنبيها. فيلم (دكان شحاتة).
- يا جدعان انا عايزكوا تفهموني، افهموني يا جدعان، انا جايب مجموع في الثانوية العامة، محدش جابه، 51 في المية، يعني ممكن ادخل اي كلية. فيلم (فول الصين العظيم).
- الحب الحب الشوق الشوق. فيلم (اللمبي).
- هاتوا الفلوس اللي عليكوا. فيلم (عيال حبيبة).
- ارقصوا يا نسوان، ونبي ما لينا إلا بعضينا. فيلم (يانا يا خالتي).
- انتي بيضا وانا بيضا ازاي نخلف صباع العجوة ده. فيلم (اللمبي).
- مش هتيجي؟ مش هروح. فيلم (بيكيا).
- زكريا الدرديري مدرس رياضيات وفرنساوي لحد ما يجيبوا مدرس فرنساوي. فيلم (الناظر).
- انا سمعت كل حاجة، إني أفهم كلمة، مفهمتش حاجة خالص، كله شنص شنص شنص. فيلم (عندليب الدقي).
- من النهاردة مفيش حكومة، أنا الحكومة. فيلم (الجزيرة).
- أنا بابا يالا. فيلم (تيتو).
- أوعى يغرك جسمك. فيلم (الناظر).
- هتقولهملي نيللي نيللي هقولهملك شريهان شريهان. فيلم (الناظر).
تم نسخ الرابط
