الخذلان من أقرب الناس

كنت بشوف عيلتنا حلوة كتير، بس أوقات، شخص واحد ممكن يدمر كل شي إذا كان أناني وبيفضّل حدا عن حدا… أنا فريال لولك وهي فكرة عن الخذلان من أقرب الناس.

الخذلان من أقرب الناس سكين ينحر رقبتك

في شي جواتي عبالو يطلع، ويرتاح هالجسم شوي من وزنو على قلبي…. مابقدر وضّحو ولا أعطيه تعريف ولا حتى أحكيه بشكل تفصيلي وواضح كتير، بس ببساطة هو نوع من القهر الداخلي اللي بتعيش فيه لمّا تنخذل من أقرب الناس لهيك لازم اتحفّظ شوي على التفاصيل مو!!.

في أشخاص بعمرك ما أذيتهم وكل وقتك مادد أيدك لتساعدهم، أشخاص بيعرفوا تماماً شو عم تعاني وشو عم تحس وماعم يقصروا أبداً أنهم يكونوا مشاركين بوجعك كمان…… بالنسبة ألهم مصلحتهم فوق كل شي…. أنت شو؟ هني شايفين أنت مانك عم تنضر، وليش دخلك لتنضر؟ شو عم يعملوا يعني غير أنن يستغلوك وضاربينك بمنية أنو رادينلك الجميل!!.

أيا جميل رديتو دخلكم؟ أنكم ماعم تقصروا لحظة بأنكم تذلوا وتهينوا الشخص بتصرفاتكم العشوائية ولا مبالاتكم لطريقة حياتو وطبيعتو؟، كيف بتقدروا تميزوا حدا عن حدا، تخلقوا فجوة بين الأخوة رغم أنو الكل نزلوا من بطن وحدة….. كيف قادرين تتلاشوني بهالطريقة وكأني مو موجودة!!.

يمكن شايفين أني قوية، وقادرة دبر حالي، بس غيري حرام ماقادرين، فلازم أنا ساعدن، لازم ضل واقفة جنب الكل ووقت أنا أبكي بالليالي مالاقي مين يوقف جنبي لأنو مابيقدروا، ببساطة مالن قدرة يساعدو متلك….. أنتي بس اللي قادرة تساعدي…. وأنا ماعندي مشكلة أبداً، بس ما يكون الطلب من هالشخص بالذات، هاد يلي بيعرف أني أقل وحدة بين الكل، أني هامش وصفر على الشمال…. منك أنت بالذات ماكان بدي اسمع هالشي.

منطق غريب وأعوج

بطلت أفهم راس هالناس، كيف بفكروا وشو بيحسوا، شلون بيقدروا يهتموا بحالن وبمصلحتن فوق مصلحة حتى أولادهم، أنو أنتو من أي طينة معجونين؟ ليه لتولدوا جواتي كره أعمى ألكم بطّل شوف فيه المنيح منكم وشوف بس القبيح؟.

وقت تعرفوا أني عم طح وقاتل وأسعى وأسهر لأعمل شي لنفسي، وتجو عالبارد المستريح تشوفوا أنو لازم ساعد الكل وساعدكم وأنتو مقتدرين أصلاً، وأنو أنا أصلاً مشواري طويل فـ عادي كملوا أسا بالشغل والتعب والسهر وقتا بتكونوا أنانيين بدرجة كبيرة كتير.

صار فيكم تعطوا لنفسكم صفقة قوية وتحية لأنو أنتو حولتوني من شخص منيح لحدا قبيح كتير، حدا بدو يصير متلكم، أناني وبهمو حالو وبس، من قبل غيرتو فيي هالطيبة شوي وعملتوني حدا جفص ومابيتهاون أنو يظهرلكم انزعاجو من تصرفكم، وهلق حولتوني لشخص ماعاد حيعتبركم من دمو!!….. انتهى.