مجموعة فوازير مصرية ترفيهية مضحكة
باقة فوازير مصرية ممتعة وشيقة، تجعلك تشعر بالبهجة والسعادة، كما أنها سهلة السرد، لذلك يمكنك مشاركتها مع أفراد أسرتك لمتعة لا تنتهي.
أجمل فوازير مصرية مع الحل
- ليه بنشرب الشاي؟
- عشان مش بيتاكل.
- ليه القطة بتدخل عند الحلاق؟
- عشان الحلاق بابه مفتوح.
- ليه الأقرع بيروح للحلاق؟
- عشان ياخد القطة.
- أما الطماطم بتعطس بتقول ايه؟
- كا كا كاتشب.
- ليه التلاجة غبية؟
- عشان بتحفظ الأكل بس مش بتفهمه.
- ايه اللي بين السما والأرض؟
- حرف الواو.
- حاجة بتاكل منها بس هي مش بتتاكل، تبقى ايه؟
- الطبق.
- حاجة بتاكل ومبتشبعش وتموت لو شربت، تبقى ايه؟
- النار.
- عشرة وعشرين وأدهم مرتين وخمسة وتلاتة واتنين، يبقوا كام؟
- 100.
- ايه الحاجة اللي بتشيلها وتشيلك في نفس الوقت؟
- الجزمة.
- حاجة مش بتتحرك إلا لما تتضرب، تبقى ايه؟
- المسمار.
- حاجة بتتكلم من غير لسان وبتسمع من غير ودان تبقى ايه؟
- التليفون.
- ايه هو عكس بطانية؟
- بطة مستوية.
- ايه هو عكس نجيب محفوظ؟
- نودي محفوظ.
- حاجة بتشوفها في الليل تلات مرات وفي النهار مرة واحدة، تبقى ايه؟
- حرف اللام.
- ليه النمر بيجري ورا العربية؟
- عشان يبص على النمرة.
- ليه اليابان دولة مش حنينة؟
- عشان اليابان في قارة آسيا.
- ليه الكيبورد مش بينام؟
- عشان عنده اتنين Shift.
- حاجة موجودة في القرن مرة واحدة، وفي الدقيقة مرتين ومش موجودة في الساعة، تبقى ايه؟
- حرف القاف.
- واحد قتل أمه، وأبوه، وخاله وكمان عمه، وبعدين قطع رجله؛ ليه؟
- عشان رجله متجيش في القضية.
- واحد شرب بنزين، وطلع جري على المستشفى وقبل ما يوصل على بابها وقف؛ ليه؟
- البنزين خلص.
- ليه مش بيزرعوا تين في الأرجنتين؟
- عشان الأرجنتين من الدول اللاتينية.
- ايه هو الحيوان التعيس؟ وليه؟
- القطة، عشان بتخربش ومبتكسبش.
- ليه الأرنب مش بيعدي من ادام القهوة؟
- عشان بيخاف من السحلب المكار.
- ليه الواحد بيحط جنبه كوباية شاي وهو نايم؟
- عشان الشاي من المنبهات.
- ليه الحمار الوحشي حيوان قديم؟
- لأنه أبيض وأسود.
- ايه اللي عمله الرومانيين بعد ما عبروا البحر المتوسط؟
- نشفوا هدومهم.
- أنهو الأبعد، روسيا ولا القمر؟
- روسيا، لأننا بنشوف القمر بس مش بنشوف روسيا.
- حامل ومحمول، نصها ناشف ونصها مبلول، تبقى ايه؟
- المركب.
مجموعة فزورات مصرية سهلة
- ايه الفرق بين الكمبيوتر والتاكسي والحفرة؟
- الكمبيوتر حاسب آلي، التاكسي حاسب يا أسطا، والحفرة حاسب لا تقع.
- حاجة بتلاقيها على الشجر لونها أخضر وفي السوق لونها أسود وفي الكوباية لونها أحمر، ايه هي؟
- الشاي.
- ايه هو العقرب اللي مبيلدغش؟
- عقرب الساعات.
- في الهوا طار وملهوش لا ريش ولا منقار؛ ايه هو؟
- الدخان.
- حاجة بتمشي من غير رجلين وبتعيط من غير عينين؟
- السحاب.
- ايه الفرق بين الأسبوع، والموس، والصحرا؟
- الأسبوع فيه حد واحد، الموس فيه حدين، والصحرا مفهاش ولا حد.
- حاجة متشتغلش إلا لما تحط صوابعك في عينها، تبقى ايه؟
- المقص.
- حاجة ليها سنان ومش بتعض؟
- المشط.
- حاجة ليها أربع رجول ومع ذلك مش بتمشي، تبقى ايه؟
- الكرسي.
- حاجة ليها عين ومش بتشوف، تبقى ايه؟
- الإبرة.
- طالع نازل مبيتهزش، هو ايه؟
- السلم.
- حاجة بتطير بسرعة البرق وملهاش جناحات، تبقى ايه؟
- المرتب.
- حاجة تقدر تمسكها من غير ما تلمسها، هي ايه؟
- أعصابك.
- حاجة دايما أدامك بس مش شايفها، تبقى ايه؟
- المستقبل.
- حاجة مهما تحطها في التلاجة مش بتبرد، تبقى ايه؟
- الشطة.
- ايه الحاجة اللي عشان تستخدمها لازم ترميها؟
- شبكة الصيد.
- ايه هو آخر الدنيا؟
- حرف الألف.
- رجله على الأرض وراسه فوق النجوم، يبقى ايه؟
- الظابط.
- ابن أمك وأبوك، ومش أختك ولا أخوك، يبقى مين؟
- انت.
- اخت خالك ومش خالتك، تبقى مين؟
- أمك.
- مين هو الخال الوحيد لأولاد عمتك؟
- أبوك.
- حاجة طول ما انت بتشوفها مينفعش تلبسها، ويوم ما تلبسها مبتشوفهاش، تبقى ايه؟
- الكفن.
- حاجة بتوصلك لأي مكان انت رايحه من غير ما تتحرك، تبقى ايه؟
- الطريق.
- حاجة ليها خمس صوابع، ومفهاش لا لحم ولا عضم، تبقى ايه؟
- الجوانتي.
- حاجة كل ما تزيد تقل، تبقى ايه؟
- العمر.
- حاجة سودا بس مش بنستفاد منها إلا لو بقى لونها احمر، ايه هي؟
- الفحم.
باقة فوازير مصرية مضحكة
- ليه القطر بيقف أدام الصيدلية؟
- عشان يشوف القطرة.
- ليه الحمار بيحب ياكل الشوك؟
- عشان حمار.
- ايه الفرق بين البطة والوزة؟
- البطة بتبلبط في المية، لكن الوزة مش بتبلوز في المية.
- ليه القرد من أسرع الحيوانات؟
- عشان القرد في عين أمه غزال.
- ليه القطنة بتحبها كل الناس؟
- عشان القطنة مبتكدبش.
- راجل مشي في المطر ومتبلتش منه شعرة واحدة، رغم انه معهوش شمسية ومش لابس طاقية، ليه؟
- عشان أقرع.
- ليه الخشب يتيم؟
- لأنه مقطوع من شجرة.
- واحد عمل كوباية ليمون سخن للكمبيوتر بتاعه؛ ليه؟
- عشان الكمبيوتر عليه فيروس.
- شوكة وقعت على الأرض ومرنتش؛ ليه؟
- معهاش رصيد.
- ليه شجرة الدر أسرع من البقرة؟
- عشان شجرة الدر من الجواري، لكن البقرة من المواشي.
- ايه الفرق بين الزير والقلة؟
- فيه فوازير بس مفيش فواقلة.
- حاجة طايرة في السما لونها أبيض وبتقول مياو، ايه هي؟
- قطة بيضا واحد ضربها بالشلوط.
- حاجة سودا طايرة في السما وبتقول مياو، ايه هي؟
- غراب بيتريق على القطة البيضا.
- معاك أربع بنطلونات، وأربع قمصان، وتلات شوزات، يبقى الناتج ايه؟
- أربع أشخاص فيهم واحد حافي.
- ايه الفرق بين الليمون والزيتون؟
- الليمون ممكن نعمل منه ليمونادة، لكن الزيتون مش ممكن نعمل منه زيتونادة.
باقة من فوازير الاطفال الممتعة
- حاجة كبيرة أد الفيل، ومع ذلك ملهاش أي وزن، تبقى ايه؟
- ظل الفيل.
- حاجة ينفع تاكلها بليل بس مينفعش تاكلها الصبح، تبقى ايه؟
- وجبة العشا.
- ما هو لون بيض الديك الهندي؟
- هو الديك بيبيض!
- واحد لما كان عنده 4 سنين، كان عمره ضعف عمر اخته، يا ترى هتكون أخته عندها كام سنة لما يبقى عمره 100 سنة؟
- 98 سنة.
- حاجة بتشوف كل حاجة وهي معندهاش عيون، تبقى ايه؟
- المرايا.
- مدينة أسوارها خضرا، جدرانها حمرا وسكانها سود، تبقى ايه؟
- البطيخة.
- حاجة موجودة في السما، ولو زودنا ليها حرف هتبقى موجودة في الأرض، تبقى ايه؟
- نجم، لو زودنا حرف الميم تبقى منجم.
- ابن المية ويموت لو اتحط فيها، يبقى ايه؟
- التلج.
- حاجة موجودة في الشتا خمس مرات وفي الصيف مرتين، ايه هي؟
- النقط.
- حاجة تنزل في المية ومتتبلش، ايه هي؟
- الضوء.
- ايه هي الحاجة الموجودة في نص باريس؟
- حرف الراء.
- حاجة ليها ورق بس مش شجرة؟
- الكتاب.
- راسه خضرا وجسمه اسود بس قلبه ابيض، يبقى ايه؟
- البدنجان.
- شجرة لا ليها ظل ولا ليها فروع، تبقى ايه؟
- شجرة العيلة.
- ايه البحر اللي مفهوش مية؟
- البحر اللي على الخريطة.
- ايه البيت اللي لا له باب ولا شبابيك ولا فيه حيطان؟
- بيت الشعر.
- محدش بيرحمه والكل بيضربه، ايه هو؟
- الجرس.
- بيمشي من غير رجلين ومش بيدخل إلا في الودنين، يبقى ايه؟
- الصوت.
المصادر: Tasleyah.Com + رائج + قناة عشاق المعرفة على يوتيوب.
تم نسخ الرابط
