خاطرة ماتنطر شي وخليك بلا ولاشي

أنو أنت أساساً، ليه غيّرت عاداتك؟ مو قلت الدني كانت أريح بدون حدا؟ مافهمت يعني ليه حبيت تطلع عن عاداتك!، طب ليك ماتنطر شي وخليك بلا ولاشي.

ماتنطر شي وخليك بلا ولاشي هيك أريح صدقني

بالحياة في أشخاص بيجوا هيك بدون سابق انذار، فجأة، أو صدفة، بالوقت اللي أنت فيه مقرر تتجنب التعاطي مع الناس، مبعّد عن العلاقات أياً كانت، عم تحاول كتير تبقى بالسليم بعيد عن قيل وقال وليش هيك وتبريرات وتنطر اهتمام وينطر الشخص اهتمام!!.

بس للأسف، بتوقع… بتشوف هاد الشخص يلي أجا بلمح البصر، مابيشبه شي من اللي شفتو قبل، مانو متلن، هو مختلف أكيد مختلف… وبتدخل بدوامة عرّفها كيف مابدك، دوامة حب أو دوامة صداقة أو علاقات مالها تعريف أو مسمى.

بتلاقي حالك رجعت لنفس القصة… بدك ياه متل ماعوّدك يكون، بتنطر منو الأكتر، بدك يعطيك متل ماعم تعطيه… بعطيك حب؟ أي بدي حب لكن!!.

بعطيك اهتمام؟ بدك تردلي ياه بالمقابل، ماحدا عم يزادو ع حدا، عم نتساوى!!، هي الموضوع ببساطة، مافيي أعطيك وخصوصي إني معطاءة، بدون مالاقي منك نفس الشي بالمقابل، وإذا كان أكتر مو مشكلة ابداً!!.

بتعرف ليش هيك بكون؟ لأنو ناقصني كتير، كتير ناقصني وأنت أكتر حدا بيعرف هالشي، بس مع هيك طنّشت وتمردت وتعاملت على أنك أكبر من أنو تتنازل، ماسك شواربك وماشي، وشايف أيا تصرف عم يهين رجولتك، عم يخليك تنفر وتبعد وتحس أنو مانك مضطر تعطي وجه لأنك أكبر من هيك.

شايف حالك ماعملت شي، بتحكي لنفسك: أي وشوفيا يعني إذا ماحاكيتك؟ أنا مالي حياة يعني؟ مابصير أتنفس؟ ألعب؟ أتسلى؟ مافهمت؟.

أي حقك طبعاً، بس بالمقابل أنا كمان ماعاد خرج كون متوفرة وقت اللي بدك، وقت تفضى ووقت يكون عبالك، أنا بحسبا بميزان، بدك ياني بتلاقيني، بس وقت بدي ياك ومالاقيك معناها ماعاد خرج تلاقيني!!.

هيك ببساطة، أنا بخبرك مرة وتنين وتلاتة شو اللي بيقهرني، ولمّا شوفك عم تكرر الفعل، معناها أنت قاصدو، مالها غير معنى، وبتعرف تماماً أني مو هيك، ما بالعادة بنزعج، ولا بالعادة بنقهر متل هلق، بس احسبا براسك، ليه هالمرة الموضوع زعجني كتير؟.

أو مالك حيل حتى تتعب عقلك بالتفكير؟ بتفهم اللي بيهمك واللي مابيهمك مابتفهمو!، طيب رح خبرك ليه…. لأني بهالوقت كنت محتاجتك، بهالوقت كان عبالي تكون موجود، أنت جيت لحياتي وفرضت حالك علي، أنت دخلت عنوة وصار مطرحك محفوظ، مافيك تجي بعد ما تعودني تصير بدك تغيب.

مالازم تغيب أصلاً وأنا مالي غيرك، أنو وبعدين يعني؟ عموماً أنا مو مسامحتك، ومنّك بالذات ماتوقعتا أصلاً، لهيك بحب قلك، مابقا تنطر مني شي!!.